धात्रीलौहरजोव्योषनिशाक्षौद्राज्यशर्कराः ।  लेहो निवारयत्याशु कामलामुद्धतामपि॥३०॥

षट्पलं शुद्धमण्डूरं यवस्य कुडवं तथा । पाकाय नीरप्रस्थार्द्ध चतुर्भागावशेषितम् ॥१४८॥ 

शतमूलीरसस्याष्टावामलक्या रसस्तथा । तथा दधि पयो भूमिकूष्माण्डस्य चतुष्पलम् ॥१४९॥

चतुष्पलं सर्पिरिक्षुरसं दद्याद्विचक्षणः । प्रक्षेपं जीरकं धान्यं त्रिजातं करिपिप्पली ॥१५०॥

मुस्तं हरीतकीञ्चैव लौहमभ्रं कटुत्रिकम् । रेणुकं त्रिफलाञ्चैव तालीशं नागकेशरम् ॥१५१॥

प्रत्येकं कार्षिकञ्चूर्ण पेषयित्वा विनिक्षिपेत् । भोजनादौ तथा मध्ये चान्ते चैव समाहितः ।१५२॥

तोलैकं भक्षयेन्नित्यमनुपानं पयोऽथवा । शूलमष्टविधं हन्ति साध्यासाध्यमथापि वा ॥१५३॥

वातिकं पैत्तिकञ्चैव श्लैष्मिकं सान्निपातिकम् । परिणामसमुत्थांश्च अन्नद्रवसमुद्भवान् ॥१५४॥

द्वन्द्वजानपि शूलांश्च अम्लपित्तं सुदारुणम् । सर्वशूलहरं श्रेष्ठं धात्रीलौहमिदं शुभम् ॥१५५॥