रास्ना वातारिमूलञ्च वासकञ्च दुरालभम् । शटीदारुबलामुस्तानागरातिविषाऽभयाः ॥२६॥

श्वदंष्ट्रा व्याधिघातञ्च मिसिधान्यपुनर्नवाः । अश्वगन्धाऽमृता कृष्णा वृद्धदारः शतावरी ॥२७॥

वचा सहचरश्चैव चविका बृहतीद्वयम् । समभागान्वितैरेतै रास्नाद्विगुणभागिकैः ॥२८॥

कषायं पाययेत्सिद्धमष्टभागावशेषितम् । शुण्ठीचूर्णसमायुक्तामाभाद्येन युतं तथा ॥२९॥

अलम्बुषादिसंयुक्तमजमोदादिसंयुतम् । यथादोषं यथाव्याधिं प्रक्षेपं कारयेद्भिषक् ॥३०॥

सर्वेषु वातरोगेषु सन्धिमज्जगतेषु च । आनाहेषु च सर्वेषु सर्वागात्रानुकम्पिने ॥३१॥

कुब्जके वामने चैव पक्षाघाते तथाऽर्दिते । जानुज‌ङ्घास्थिपीडासु गृध्रस्यां च हनुग्रहे ॥३२॥

सर्वेषां पाचनानान्तु श्रेष्ठमेतद्धि पाचनम् । महारास्नादिकं नाम प्रजापतिविनिर्मितम् ॥३३॥

(Bhaishajya Ratnawali, Aamvatrogadhikara 29/26-33)